Nork esan zuen trikitixa erromerietan jotzeko musika soilik zela? Nork uste zuen trikitixa panderoarekin soilik lagunduta joan zitekeela? Hau uste zutenek entzun dezatela Gose taldearen izen bereko diskoa; bertan trikitixa inoiz entzun gabeko eran entzuteko aukera ematen baitu. Hirukoa da honako talde arrasatear hau, eta 2004. urtean ekin zioten lanean; urtebete igaro eta diskoa kaleratu dute.
Talde honen aurretik Lin Ton Taunek eta The Solanosek egin dute trikitixarekin proba, eta emaitza ez da batere txarra izan. Hala ere, aipatutako bi talde hauek trikitia rock & roll eta punkarekin uztartzen bazuten, Gosek elektronikarekin egiten du batez ere. Arrasatear hauek egiten duten musika zer den zehaztea zaila bada ere, beren abestietan elektro-jazza, tangoa, sehaska kantu bat, afro-braziliar perkusioak panderoarekin batuta, teknoa, punka, hardkorea eta arin-arinak entzun daitezke. Ikusten den bezala, alor ugari hartzen ditu bere baitan talde honek, eta hori da Gose on egiten duena; halako nahasketa bat ezin baitu edonork egin, eta hauek ederki asko uztartu dituzte alderdi hauek guztiak trikitiaren laguntzarekin. Esperientzia ere badaukate musika munduan: ahots nagusia, trikitixa eta panderoa jotzen dituen Ines Osinaga, Ekon taldean ibili zen koruak egiten, eta programazioez arduratzen diren Iñaki Bengoa eta Tadeos Bad F-Lineeko taldekide ohiak dira.
Musika, nahiz eta orokorrean elektronikoa izan, atsegina egin daiteke edonorentzat, eta Inesen ahots gozoak are atseginago bilakatuko du sentsazio hau. Kolaborazioak ere izan ditu disko honek, eta luxuzkoak gainera; Evaristo (Gatillazo eta La Polla Records), Francis (Doctor Deseo), Juanito Sangre (Ekon), Jimy (Soziedad Alkoholika), Ti2no, eta Txemak (Bad F-Line) beren laguntza eskaini die arrasatearrei. Azpimarratzekoa iruditzen zait Renato abestian, 80ko hamarkadatik punk musika egiten ari den Evaristoren laguntza; horrelako musika motan entzutea ohituta ez bagaude ere, ederki egiten baitu bere betebeharra, euskaraz abestuz gainera.
Gose gustura entzuteko talde bat da, dantza egiteko edo lasai egoteko; herriko plazan jo dezakete edo edozein taberna edo salatan. Beren aurkezpen kontzertua esaterako, Pitilingorri sex-shopean eman zuten, izan ere, arrasatearren hitzak sexuari buruz mintzo dira, lizunak eta askeak dira.
Talde honek Euskal Herrian trikitixaren gainean zegoen ikuspegia aldarazi egin du, inork ezin pentsa baitzezakeen musika elektronikoa musika herrikoi honekin uztar zitekeenik. Bere garaian ere antzeko zerbait pentsatuko zen Lin Ton Taun taldearen inguruan, baina izan zuen arrakasta kontuan hartuta, Gosek ere beste horrenbeste izan dezake; bere garaian hautsita ematen zuten moldeak hautsi dituztela esan genezake. Molde haustura guztiak halakoak balira, hauts bitez molde oro!
Naturaltasunez sortutako taldea dela ere esan genezake, sexuaren inguruan eta musika atseginarekin. Ekon eta Bad F-Line nahiko elektronikoak baziren, orain bi hauen kideak elkartzean sortutako taldea ere ildo nahiko antzekotik doa, baina nortasun propioarekin.
Euskal Herriko musika panoraman erreferentziatzat hartzeko moduko taldea da honakoa. Jende ugariri entzun diot euskal musikaren egoera gaizki dagoela, baina ez dakite zer dioten ere; sormena badago, eta edozein musika mota euskaraz entzuteko aukera daukagu, eta baita hemen soilik egin daitekeena ere. Horietako bat dugu Gose. Trikiti tradizionala edo musika elektronikoa atsegin duenak ere entzuteko modukoa; bi musika mota hauek oso atseginak ez dituenak ere gustura entzungo lukete, nire kasuan, esate baterako.
Gosek haize freskoa ekarri dio trikitixaren munduari, aurretik aipatutako bi taldek (Lin Ton Taun eta The Solanos) ere ekarri zieten bere garaian, eta orain garai berriei egokitzean era dotorean lortu dute.
masterra01 